العشوائيات من المرج لحلوان

لاتزال قضية العشوائيات متربعة على عرش القضايا المهمة فمن منا لايحلم بسكن هادىء بلا ضوضاء او زحام الاشغالات تملأ الاحياء من شرق القاهرة المرج عين شمس _ وحتى حلوان والاهالى يشكون مر العيشة من التكدش للبا ئعين فبالطبع اى زحام ينتج عنه كوارث من سرقة الى خطف بل وصل لحد التحرش يعنى السادة الحرامية ما يتعبوش نفسهم ويحطو خطط للسرقة المجال مفتوح والله ادامهم كل اللى عليهم يمشوا فى شوارع المرج او شارع احمد عرابى عين شمس اللى فيه العتبة اتنقلت وكمان حلوان يقفوا عند محطات المترو ويعملو نفسهم بيشتروا ويصطادوا الزباين ده بالنسبة للحرامية اما البلطجية اللى حالهم واقف ينشطو نفسهم شوية من مساعدة فى مشاجرات والحمد لله المسئولين بالاحياء طيبين قوى وبيتغاضو عن قطع الارزاق فى الحالات دى ............ المواطن مش عارف يلاقيها منين ولا منين زيادة الاسعار والزحام الخ............ حتى حقه فى الشارع ضايع يمشى فوق الرصيف فين ما المحتلين الجدد قايمين بالواجب والمكان يا ولداه ضاق فوق الرصيف ما يعديش عيل صغير طب تحت الرصيف برضوا بياعين وعربيات بتصارع للخروج من النفق الحالى (الشارع سابقا) طب يعمل ايه بس الواحد تتخانق مين ينجدك يا عينى الشرطة وبهدلة الاقسام ولا الحى واهماله ولا الناس وسلبيتها ....... بجد حاجة تغيظ انا مش عايز اتفسح واسمع العنب انا عايز الاقى راحة فى بيتى ومن الشباك لما ابص الاقى منظر جميل وهدوء مش شوية بياعين بيقسموا الرصيف وبيتخانقو عليه والحى يمر بعربياته كله تمام وبعدها كأنك يا ابو زيد ما غزيت انا شايفة ان الحل الوحيد ان الاحياء هى اللى تتنقل وتسيب المكان للبياعين والاشغالات ياخدو راحتهم وربنا يعين الحى عليهم مسئولية كبيرة!!!!!! ياريت بقى ما نسمعشى المسئول الفلانى او العلانى قام بجولة بعين شمس او حلوان ولا حتى شبرا لحل المشاكل .